raftónar

Nico Muhly – Drones & Piano

16-05-2012

Nico Muhly - Drones & Piano

Þann 21. maí næstkomandi kemur út glænýtt verk eftir Nico Muhly og nefnist það Drones & Piano. Smáskífan inniheldur fimm lög og var tekin upp af Paul Evans í Gróðurhúsinu, hljóðveri Valgeirs Sigurðssonar, sem sá um hljóðblöndun og hljóðjöfnun. Um flutning Drones & Piano sér hinn virti píanóleikari Bruce Brubaker, auk þess sem Nadia Sirota leikur á víólu og Nico sér um auka hljóðdrunur. Hægt er að nálgast verkið í sérstakri forsölu hjá Bedroom Community. Drones & Piano er fyrsta smáskífan af þremur undir heitinu Drones eftir Nico Muhly og jafnframt fyrsta útgáfa hans hjá Bedroom Community síðan I Drink The Air Before Me kom út árið 2010. Verkið var frumflutt fyrst á Gilmore Keyboard hátíðinni 7. maí síðastliðinn.

Nico Muhly er bandarískt nútímatónlist, fæddur í Vermont og uppalinn í Rhode Island. Tónlistaráhuginn var ávallt til staðar, enda söng hann í kirkjukór á sínum æskuárum og hóf píanólærdóm 10 ára gamall. Hann nam við hinn virta listaháskóla Juilliard í Nýju Jórvík undir handleiðslu Christopher Rouse og John Corigliano. Hann hefur starfað með mörgum af þekktustu tónlistarmönnum samtíðarinnar, svo sem Björk, Philip Glass, Jónsa (Sigurrósar-Jónsi, ekki Júróvisíon-Jónsi) og Bonnie Prince Billy.

Bruce Brubaker er bandarískur píanisti, fæddur í Des Moines og nam við fyrrnefndan Juilliard listaháskóla undir handleiðslu Jacob Lateiner. Hann kenndi við skólann síðar meir og miðlaði þar af reynslu sinni sem einn af virtustu píanistum bandarískrar nútímaklassíkar. Eftir hann liggja nokkrar útgáfur, þá oftast nær á Arabesque Records, þar sem hann hefur spilað verk eftir Philip Glass, John Cage, Alvin Curran og fleiri.

Hlekkir

Bedroom Community á hvarmskinnu

Vefsíða Bedroom Community

Vefsíða Nico Muhly

Drones & Piano á Bandcamp

Lesa meira

Viktor Birgiss – Wonderings

11-05-2012

Fréttir

Viktor Birgiss - Wonderings

Í dag kom út frumburður FreeRotation Records, sem er nýtt íslenskt útgáfufyrirtæki, rekið af Viktori Birgiss og Jónbirni Finnbogasyni. Um er að ræða stuttskífuna Wonderings með ungstirninu Viktor Birgiss og er um að ræða eðal djúp hús með glaðlegum sumarundirtón. Tilvalin sumartónlist fyrir kubbaspil á Miklatúni eða hjólabrettaiðkun við Reykjavíkurhöfn. Hægt er að fjárfesta í plötunni í gegnum Gogoyoko og kostar hún einungis 193 isk, sem er gjöf en ekki gjald.

Naskir áhugamenn kannast líklegast við bæði lögin sem finna má á stuttskífunni, en þau voru á lagalista Reyk Veek 03, sem út kom fyrir um mánuði síðan. Lagið Wonderings tekur lagið Run Wild með Barbra Streisand, en hún var b-hlið stuttskífunnar Woman in Love sem út kom árið 1980. Þess má geta að bræðurnir Barry og Robin Gibb útsettu lagið fyrir hana. Útsetning Viktors er snyrtileg og glaðleg, sem gerir það að verkum að Barbra Streisand hefur aldrei hljómað jafnvel. Hitt lagið á stuttskífunni nefnist Pale Blue Dot og sarpar Viktor þar m.a. Carl Sagan. Orðatiltækið kemur í kjölfar ljósmyndar sem Voyager 1 tók af jörðinni í metfjarlægð þar sem jörðin er sýnd í 0.12 pixelstærð. Þó svo Sagan einblínir á hversu lítilmegnuð við erum í hinum stóra alheimi, þá er lagið sem finna má á stuttskífu Viktors stórt og mikilfenglegt.

Hlekkir

Free Rotation Records á hljóðskýinu

Fjárfestu í Wondering með Viktor Birgiss á Gogoyoko

Viktor Birgiss á hvarmskinnu

Lesa meira

Zowie vs. Apfelseed – 1500

09-05-2012

Fréttir

Zowie vs. Apfelseed

Þann 12. apríl síðastliðinn kom út örstuttskífan 1500 með raftónlistarmönnunum Zowie (Óskar Þór Arngrímsson) og Apfelseed (Baldvin Albertsson). Skífan þessi kemur út á vegum Synthadelia Records og er sýnishorn af væntanlegri stuttskífu þeirra félaga sem út kemur er nær dregur sumri, en útgáfufyrirtækið hafa verið ötulir að undanförnu við að gefa út íslenska jaðartónlist. Um er að ræða afslappandi furðurafpopp, sem hentar vel bæði fyrir tedrykkju og almenningsóspektir. Hægt er að nálgast örstuttskífuna, sem telur lagið 1500, á Gogoyoko og er verðinu stillt í hóf.

Lesa meira

Jóhann Jóhannsson, Dustin O’Halloran og Hauschka – The Transcendentalism EP

06-05-2012

Fréttir

Jóhann Jóhannsson

Þann 21. maí næstkomandi kemur út samstarfsstuttskífan The Transcendentalism EP með raflistamönnunum Dustin O’Halloran, Hauschka og okkar alíslenska Jóhanni Jóhannssyni. Stuttskífan kemur út í tilefni af sameiginlegu tónleikaferðalagi þeirra um Evrópu nú í maímánuði, en ferðalag þeirra stendur yfir daganna 15. maí til 22. maí og verða haldnir alls átta tónleikar. Það er breska útgáfufyrirtækið Fat Cat sem stendur að útgáfunni og verður hægt að nálgast skífuna á rafrænu formi sem og vínyl formi, þó svo að hún verði af skornum skammti (e. Limited edition).

Lesa meira

M-Band – EP

30-04-2012

Fréttir

M-Band

Þann 11.mars síðastliðinn kom út stuttskífan EP eftir tónlistarmanninn M-Band (Hörður Már Bjarnason). Um er að ræða sex frumsamin lög. Þrjú þeirra sungin af Herði og tvö þeirra sungin af meðlimum RetRoBot (sigursveit Músíktilrauna í ár) og Báru Jónsdóttur. Skífan er fánanleg á gogoyoko og heimasíðu tónlistarmannsins.

Nafnið M-Band fann Hörður í bók sem heitir Innsýn í mannlega tilveru eftir Einar Þorsteinn Ásgeirsson. Þar er því haldið fram að M-Band sé hugtak yfir þær bylgjur sem mannskepnan gefur frá sér; tilfinningar og hugsanir. „Frekar skrítin lesning“ viðurkennir Hörður, „Ég kolféll fyrir því eftir að hafa verið að leita að nafni lengi til að vinna undir. Mér finnst gaman að skrifa texta um tilfinningar og mannlega hluti svo þetta hitti beint í mark“. Hljóðglefsurnar (e. samples) tók hann upp sjálfur: „Það var mjög misjafnt hvaða hljóð ég notaði, og í raun fór ég út í að taka upp sömpl án þess að vita hvað það var sem ég var að leita að. Ég prófaði að taka upp þegar ég barði ónýtum handþeytara utan í bjórglas og notaði það loks í House of Contrition sem hristu. Einnig hjálpuðu vinir mínir á Laugarvatni mér að búa til hljóð eins og köllin og klöppin í Misfit. Í Prelude notaði ég gamla Alesis synthann minn sem er eitthvað mikið bilaður og gefur aðeins frá sér mjög minimalísk, ambíent óhljóð“. Á döfinni er að taka upp breiðskífu í sumar.

Lesa meira

Bandaríski raftónlistarmaðurinn Eskmo og Skólakór Kársnesskóla

28-04-2012

Fréttir

Eskmo

Bandaríski raftónlistarmaðurinn Eskmo (Brendan Angelides), sem hefur m.a. gefið út á stórfyrirtækinu Ninja Tune, hefur sett á netið nýtt lag með sér, þar sem Kór Kársnesskóla í Kópavogi kemur við sögu. Lagið nefnist Glacier og er í tilraunakenndum naumhyggjutæknóstíl. Forsagan er sú að raftónlistarmaðurinn Deru (Benjamin Wynn) var staddur hér á landi við gerð margmiðlunarverkefnisins Outliers vol.1: Iceland, ásamt hinum virtu ljósmyndurum Tim Navis og Kim Holtermand. Verkefnið snérist um að skapa seríu af stuttmyndum, í samvinnu við kvikmyndafyrirtækið Scenic, á hinum ýmsum stöðum um allt Ísland, undir áhrifum uppgötvunar og náttúru. Verkefnið fór nýstárlega leið til þess að fjármagna ævintýrið, en þeir notuðust við Kickstarter vefsíðuna, þar sem almenningur gat lagt sitt af mörkum. Gekk sú leið vonum framar og fjármögnuðu þeir um 46 þúsund dollurum (um 5,5 milljón isk) fyrir ferðina. Meginhugmynd verkefnisins var að skrásetja upplifun þeirra á land og þjóð. Á meðan ferð þeirra stóð heimsóttu þeir Skólakór Kársnesskóla, sem er samheiti yfir það öfluga kórastarf sem á sér stað við Kársnesskólann í Kópavogi og jafnframt heiti elsta kórs nemenda skólans. Þær hljóðupptökur sem áttu sér þar stað voru svo sendar til þeirra listamanna sem tóku þátt í verkefninu.

Lesa meira

Íslensk raftónlist á faraldsfæti

24-04-2012

Fréttir

Raftónlistarmaðurinn 7oi við iðju sína

Í maí mun tónlistarmaðurinn 7oi skjótast í tónleikaferðalag um Pólland. Þetta verður hans fyrsta tónleikaferðalag, en 7oi er alls ekki þekktur fyrir að spila oft á tónleikum, hvorki hérlendis né erlendis. Verður þessi ferð góð tilraun til að bæta úr því og spilar hann hvorki meira né minna í fimm borgum í Póllandi á jafnmörgum dögum, auk þess að fara í viðtöl hingað og þangað. Mun hann einnig gera sitt besta við að skrásetja ferðalagið með myndböndum, ljósmyndum og hverju sem er. Þetta tónleikaferðalag væri ómögulegt ef ekki væri fyrir stuðning Iceland Express sem, með Músík Express verkefni sínu, styður tónlistarmenn við að koma tónlist sinni á framfæri utan landsteinanna.

Fyrir þá sem ekki þekkja til 7oi, þá er hann (raf)tónlistamaður frá Ísafirði. Hann byrjaði að smíða raftónlist fyrir um það bil 15 árum og hefur gefið út 7 plötur síðan 1999, og er með fleiri í smíðum. Tónlistin sem hann gerir gæti reynst erfitt að flokka því að hann fylgir ekki beint neinum stefnum. Það getur farið úr háværri raftónlist í ljúfa gítarsöngva í bjagað indírokk (shoegaze) og þaðan í klassískar strengjaútsetningar og róleg og dreymandi píanólög.

Lesa meira

Ghostigital – Don’t Push Me

22-04-2012

Fréttir

Ghostigital - Dont Push Me

Óþekku óhljóðameistararnir í Ghostigital ( Birgir Örn Thoroddsen og Einar Örn Benediktsson) gáfu frá sér stuttskífuna Don’t Push Me þann 21. apríl síðastliðinn. Um er að ræða þrjú glæný frumsamin lög og endurhljóðblöndun frá Gluteus Maximus, sem margir þekkja betur sem Dj Margeir. Smekkleysa sér um útgáfuna, en hægt er að nálgast 12″ vínylútgáfu í gegnum Forced Exposure netbúðina. Stuttskífa þessi er upphitun fyrir komandi breiðskífu sveitarinnar sem hefur hlotið heitið Division of Culture and Tourism og er væntanleg í júnímánuði.

Ghostigital eru vinamargir og koma nokkrir þeirra við sögu á þessari stuttskífu. Í laginu Don’t Push Me má hlýða á rímur Sensational, sem gekk eitt sinni undir nafninu Torture. Fyrstu útgáfur hans voru undir merkjum Wordsound, sem hýsti t.a.m. Bill Laswell og Dubadelic verkefnið hans. Annar gestur sveitarinnar í fyrrnefnda lagi er Nick Zinner, gítarleikari Yeah Yeah Yeahs. Í laginu Scary Scary fá þeir í heimsókn Alan Vega (Alan Bermowitz) úr hljómsveitinni Suicide, sem gerðu það sérlega gott á sjöunda áratugnum. Þeir túruðu í Evrópu með Elvis Costello og gerðu tónlistinar fyrir bíómyndina In a year with 13 moons eftir Werner Fassbinder.

Lesa meira

Asonat – Love in Times of Repetition

17-04-2012

Fréttir

Asonat - Love in Times of Repetition

Þann 17. apríl kom út frumraun hljómsveitarinnar Asonat hjá bandaríska útgáfufyrirtækinu n5MD og nefnist þessi fyrsta breiðskífa sveitarinnar Love in Times of Repetition. Þó nafnið Asonat komi spánskt fyrir sjónir, þá er þetta samvinnuverkefni tveggja reynslubolta í raftónlistarsenunni. Annars vegar er það Jónas Þór Guðmundsson, sem hefur verið best þekktur í undirheimum raftónlistarinnar undir dulnefninu Ruxpin og hins vegar Fannar Ásgrímsson, sem er annar helmingur rafpoppsveitarinnar Plastik Joy. Á breiðskífunni er að finna 13 frumsamdar tregafullar rafballöður og fá þeir í heimsókn gesti víða að, svo sem Kjartan Ólafsson úr Ampop, frönsku söngkonuna Olèna Simon og japönsku söngkonuna Chihiro. Umslagið var hannað af Bobby Breiðholt. Hægt er að nálgast gripinn (geisladisk + niðurhalskóða) á heimasíðu n5MD og vel völdum verslunum.

Breiðskífan hefur nú þegar fengið ágætis dóma í erlendum fjölmiðlum. Netmiðillinn [sic] Magazine skrifaði m.a. eftirfarandi um plötuna: „One of the coolest records I’ve heard in a while [...]Thanks then to Asonat. for making 2012 ice cold with this sensational album, Love In Times Of Repetition. Love it, live it, share it and repeat.“

Hlekkir

n5MD á hljóðskýinu

Fjárfestu í plötunni og/eða hlustaðu á hljóðdæmi

Heimasíða n5MD

Asonat á hvarmskinnu

n5MD á hvarmskinnu

Lesa meira

B.G. Baarregaard – Nude Disco

10-04-2012

Fréttir

B.G. Baarreegaard - Nude Disco

Út er komin stuttskífan Nude Disco eftir íslenska hægdiskó- og húslistamanninn B.G. Baarregaard. Skífan er fyrsta útgáfa íslenska plötufyrirtækisins Color Me Records. Auk titillagsins Nude disco er að finna annað frumsamið lag, Rude Disco og tvær endurhljóðblandanir eftir Jón Eðvald og Steindór Jónsson. Platan er fáanleg á Beatport, Juno, Amazon og Gogoyoko.

B.G. Baarregaard er bæði ættar- og listamannsnafn Björns Gauta Björnssonar. Hann semur melódíska danstónlist sem hefur hlotið góðar undirtektir á dansgólfum hér á landi, annars staðar í Evrópu og í Bandaríkjunum. Lög hans hafa til að mynda verið leikin af Greg Wilson, Till von Sein, Local Zero, Q-Burns, Sleazy Mcqueen og Leri Ahel (Mutant Disco). Óhætt er að segja að B.G. Baarregaard sitji ekki auðum höndum, því a þessu ári hefur hann. leikið í Party Zone, spilað á Kaffibarnum, hitað upp fyrir Tim Green og Shit Robot auk þess sem hann hefur verið upptekinn við að semja nýtt efni. Nýlega lauk hann við endurhljóðblöndun á laginu Flower Time eftir íslenska tónlistarmanninn Vidarsson (Stefán Haukur Viðarsson), sem kemur út með vorinu hjá nýju útgáfufyrirtæki B.G. Baarregaard og Vidarsson, Imola Nights. Á næstu vikum er einnig von á tólf tommu frá B.G. Baarregaard sem kemur út hjá hinu bandaríska og franska útgáfufyrirtæki, Whiskey Disco.

Lesa meira

raftónar

Nico Muhly – Drones & Piano

Viktor Birgiss – Wonderings

Zowie vs. Apfelseed – 1500

Jóhann Jóhannsson, Dustin O’Halloran og Hauschka – The Transcendentalism EP

M-Band – EP

Bandaríski raftónlistarmaðurinn Eskmo og Skólakór Kársnesskóla

Íslensk raftónlist á faraldsfæti

Ghostigital – Don’t Push Me

Asonat – Love in Times of Repetition

B.G. Baarregaard – Nude Disco

raftónar á facebook

um raftónar.is

póstlisti raftóna