Berndsen – Do You Remember (Oculus Remix)

Rafkardinállínn Oculus (Friðfinnur Sigurðsson) endurhljóðblandaði tregafulla rafpopplagið Do You Remember með rauðhærða 80′s kyntákninu Berndsen og gerir það listavel. Lagið er fáanlegt á bandcamp síðu Oculus og fyrir einungis einn og hálfan dollara (173 isk, skv. núverandi gengi).

Oculus hefur víða komið við á sínum ferli, t.a.m. gefið út stuttskífur hjá útgáfufyrirtækjunum AFULAB, Playback Music og FormResonance og endurhljóðblandað Ólaf Arnalds, Sometime, Exos og Worm is Green. Hann hefur að undanförnu verið að gera frábæra hluti með stúlknasveitinni SísíEy og verið að koma fram með tæknórisunum í GusGus.

Af Berndsen er að frétta að ný breiðskífa, Planet Earth,  er væntanleg á árinu og er hennar beðið með mikillar eftirvæntingu.

Oculus á bandcamp
Berndsen á hvarmskinnu

Sonord – We Are No Strangers

Stuttbreiðskífan We Are No Strangers með hinni dönsk/íslensku rafpoppsveit Sonord kom út í dag, þann 1. maí. Meðlimir sveitarinnar eru Bjarnar Jónsson, Sigþór Frímansson og söngkonan Lone Krogh. Skífan var tekin upp í hljóðveri Bjarnars í Søborg í Danmörku og nutu þau meðal annars aðstoðar frá íslenska raftónlistarmanninum Ruxpin. Einnig kom við sögu flautuleikarinn Adele Vicaire og sellóistinn Simon Høvding. Hönnun umslags er eftir Elenu Pecci og tónjöfnun var í góðum höndum Jóhanns Ómarsson (Skurken). Skífan kemur út á hinni sískemmtilegu útgáfufyrirtæki Möller Records og er hægt að nálgast hana fyrir afar sanngjarna upphæð.

Útgáfufyrirtækið Möller Records var stofnað árið 2011 af tónlistarmönnunum Árna Grétari (Futuregrapher) og Jóhanni Ómarssyni (Skurken). Möller Records leggur áherslu á útgáfu rafrænnar tónlistar og að ljá íslenskum raftónlistarmönnum rödd á innlendum og erlendum vettvangi og kynna íslenska raftónlist.

Hlekkir
Sonord – We Are No Strangers á Möller Records
Sonord á hvarmskinnu
Möller á hvarmskinnu

Nadia Sirota – Baroque

Fyrsta útgáfa ársins 2013 hjá Bedroom Community kynnir jafnfram til leiks nýja viðbót við plötufyrirtækið; víóluleikarann Nadiu Sirota. Hún er alls ekki ókunn Bedroom Community, en hún hefur spilað inn á fjölmargar plötur útgáfunnar ásamt því að spila reglulega með listamönnum hennar á tónleikum og fylgja þeim á tónleikaferðir. Er það ekki að undra, enda Sirota með fremstu víóluleikurum sinnar kynslóðar og tök hennar á hljóðfærinu engu lík.

Tónverkin sex á Baroque eiga það öll sameiginleg að vera skrifuð fyrir Sirota af ungum tónskáldum sem hafa verið dugleg að ryðja sér til rúms undanfarin ár. Þrjú þeirra eru á mála hjá Bedroom Community; þeir Nico Muhly, Daníel Bjarnason og Paul Corley. Hin þrjú verkin eiga tónskáldin Judd Greenstein, Missy Mazzoli, og Shara Worden úr My Brightest Diamond. Tónverkin sex sem mynda Baroque tvinna saman rafmögnuðum tónum og klassískum tónsmíðum, sem saman mynda töfrandi heild sem brúar listilega bilið milli þessara tveggja tónheima.

Platan var unnin af þeim Valgeiri Sigurðssyni og Paul Evans í hljóðverinu Gróðurhúsinu og er gefin út af útgáfunni New Amsterdam í Bandaríkjunum.

Baroque kemur út þann 25. mars næstkomandi en er nú þegar fáanleg í sérstakri forsölu hjá Bedroom Community í gegnum BandCamp.

Apparat Organ Quartet – Pólýfónía

Hljómsveitin Apparat Organ Quartet leggur land undir fót í dag og heldur til Toronto, Kanada. Ástæðan eru tónleikar á stórhátíðinni Canadian Music Week, en sveitin kemur fram á þremur kvöldum hátíðarinnar auk þess sem einn helsti tónlistarmiðillinn þar ytra – Exclaim! – mun taka upp sveitina, en þeir frumsýndu einmitt nýlega myndband við Pólýnesíu af breiðskífunni Pólýfóníu sem gert var af Magnúsi Helgasyni og Sighvati Kristni Ómarssyni, meðlimi sveitarinnar.

Apparat Organ Quartet landaði nýlega samning við kanadíska plötufyrirtækið Head in the Sand um útgáfu á plötunni Pólýfóníu í Kanada. Platan kom út í síðustu viku og hefur þegar fengið frábærar viðtökur og kemur því Kanadaheimsóknin á besta tíma. Sveitin gaf út breiðskífu þessa í lok ársins 2010 á vegum 12 Tóna en tæpu ári síðar kom svo platan út fyrir erlendan markað á vegum danska útgáfufyrirtækisins Crunchy Frog. Breiðskífan hefur hlotið einróma lof gagnrýnenda og fylgdi hljómsveitin útgáfunni eftir með m.a. tónleikum í Kaupmannahöfn, Berlín og á Reeperbahn og State X tónlistarhátíðunum í Hamborg og Haag.

Hlekkir
Opinber heimasíða AOQ

Tvítsíða AOQ

Tónleikadagskrá hljómsveitarinnar í heild á CMW

AOQ á hvarmskinnu

Sísý Ey – Ain’t Got Nobody

Stuttskífan Ain’t Got Nobody með hljómsveitinni Sísí Ey kemur út þann 1. apríl næstkomandi á útgáfufyrirtækinu Radio Bongo. Fyrir þá sem geta varla beðið, þá er hægt að nálgast hana í forsölu á bandcamp. Hljómsveitin, sem er skipuð systrunum Sigríði, Elínu og Elísabetu Eyþórsdætrum, Carmen Jóhannesdóttur og raftónlistarmanninum Friðfinni Oculus Sigurðssyni, hefur verið að gera það gott undanfarið á skemmtistöðum landsins og slóu meðal annars í gegn á hinni nýafstöðnu Sónar hátíð.

Á stuttskífunni er að finna upprunalegu útgáfu sveitarinnar, ásamt raddfrírri (e. instrumental) útgáfu og stilku þar sem raddirnar fá að njóta sín (e. Acapella). Einnig er að finna fimm endurhljóðblandanir, t.a.m. eftir íslendingana Tonik (Anton Kaldal Ágústsson) og Solange Dimitriev (Guðmundur Ingi Guðmundsson).

Útgáfufyrirtækið Radio Bongo er staðsett í Reykjavík og rekið af diskóhetjunni Dj Margeiri og Stephan Stephensen. Þýski tónlistarisinn Kompakt sér um dreifingu á heimsvísu.

Hlekkir

Sísý Ey á hvarmskinnu

Fjárfesta í stuttskífunni á Bandcamp

Radio Bongo á hvarmskinnu

Octal Industries – Himinglæva/Meeting of the Waves

Í síðustu viku kom út breiðskífan Meeting of the Waves og stuttskífan Himinglæva með íslensku/amerísku rafsveitinni Octal Industries. Um er að ræða naumhyggju tæknó með sveimkenndu ívafi. Það er franska útgáfufyrirtækið Entropy Records sem sér um útgáfuna. Stuttskífan er fáanleg í 45 snúninga vínylformi, en breiðskífan er fáanleg á geisladiskaformi sem og stafrænu formi.

Octal Industries er samstarfsverkefni Michael Sickinger (Satori Corporation, Spectral Network) og Jónas Þór Guðmundssonar (Ruxpin).  Árið 2004 kom út stuttskífan Automatik á vínyl hjá bandaríska útgáfufyrirtækinu Transistor Rhythm og var það fyrsti afrakstur samstarfsins. Tveimur árum seinna deildu þeir vínyl með bandaríska listamanninum Deep Chord og tókst sú útgáfa afar vel upp. Sú útgáfa varð til þess að ákveðið var að hefja samstarf við Deep Chord um þriggja vínylplatna útgáfu undir formerkjum Spectral Network. Þær útgáfur nefndust Defragment og komu þær út í 111 eintökum á útgáfufyrirtækinu Octal.  Eftir það samstarf hægðist á útgáfum hjá tvímenningunum og einbeittu þeir sér að sínum eigin verkefnum um hríð. Það var ekki fyrr en undir lok ársins 2012 sem ákveðið var að endurvekja samstarfið. Fljótlega komu út tvær endurhljóðblandanir á verkum rússneska listamannsins Mr. Cloudy, sem og breska listamannsins G.R.I.T, en það síðarnefnda var t.a.m. valið endurhljóðblöndun ársins hjá dubtechnoblog.com.

Hlekkir

Octal Industries – Himinglæva/Meeting of the Waves

Skurken – Arnþrúður

Í dag 10. mars 2013 kom út stuttskífan Arnþrúður með tónlistarmanninum Skurken. Verkið inniheldur endurgerðir eftir Ruxpin, Futuregrapher, Tanya & Marlon, Murya, Tonik, Bistro Boy og Subminimal. Arnþrúður er tekin af plötunni Gilsbakki, sem kom út árið 2011 og fékk frábæra dóma – bæði hér heima og erlendis. Arnþrúður er óður Skurkens til Arnþrúðar Karlsdóttur, fjölmiðlastjörnu. Hún er útvarpsstjóri og eigandi Útvarps Sögu FM 99.4, einu frjálsu og óháðu útvarpsstöðina á Íslandi. Hægt er að nálgast Arnþrúði á vefsvæði Möller Records - gegn því að viðkomandi tvíti um hana eða pósti á facebook.

Gilsbakki fékk, eins og áður kom fram, prýðilega dóma hjá tónlistarspekúlöntum. Trausti Júlíusson hjá Fréttablaðinu skrifaði t.a.m. um breiðskífuna að “Gilsbakki [er] flott plata og enn ein sönnun þess að íslensk raftónlist er við góða heilsu. Tónlistaráhugamenn, sem hafa ekki enn gefið þessari tónlistartegund gaum, ættu að tékka á Gilsbakka.”

Hlekkir

Kynning á raftónlistarmanninum Skurken

Möller á hvarmskinnu

Skurken á hljóðskýinu

Skurken á hvarmskinnu

 Náðu í stuttskífuna

Gunnar Jónsson Collider – Binary Babies EP

Í dag komu út tvær stuttskífur með listamanninum Gunnari Jónssyni, annars vegar Binary Babies og hins vegar Disillusion Demos EP.  Sú fyrrnefnda inniheldur gæða rafsveimtónlist á meðan sú síðari inniheldur sungin popplög. Stuttskífan Binary Babies inniheldur sjö rafræn faðmlög og er fáanleg á Gogoyoko og hljóðskýinu (e. Soundcloud). Binary Babies var samin, spiluð, tekin upp og hljóðblönduð af Gunnari sjálfum á árunum 2006-2012.

Gunnar Jónsson hefur verið virkur í íslensku tónlistarsenunni um árabil. Á ferli sínum hefur hann verið meðlimur í rokksveitunum Coral, Bob og Japanese Super Shift & the Future Band, rafsveitinni DMG (með Fu Kaisha og Matt Mogue) og alþýðupoppsveitinni 1860. Til viðbótar hefur Gunnar komið fram opinberlega með ótalmörgum listamönnum, svo sem Ben Frost, Úlfi og nú síðast á nýliðinni RIFF hátíð með Damo Suzuki, fyrrum söngvara krautrock sveitarinnar CAN.

Fyrir þá sem vilja eignast gripinn á í efnislegu formi er bent á að senda póst á gunnar1985@gmail.com

Lesendum Raftóna geta hlaðið niður lagið VI af stuttskífunni með því að smella hérna.

Hlekkir

Gunnar Jónsson Collider á hljóðskýinu

Binary Babies á Gogoyoko

Lady boy Records – LB001

Ný tónlistarútgáfa hefur litið dagsins ljós og heitir því sérkennilega nafni Lady Boy Records. Fyrirtækið var stofnað í fyrra af Frímanni Ísleifi Frímannssyni og Nicolas Kunysz, sem rekur líka The Makery sem er vöruhönnunarstúdíó. Fyrsta útgáfa fyrirtækisins, safnplatan LB001, er mjög sérstök að því leyti að hún verður fáanleg á hljóðsnældu.

Þeir sem eiga lög á þessari safnplötu eru m.a. Ghostigital, Krummi, Bix, Sigtryggur Berg Sigmarsson (Stillupsteypa), Úlfur, Quadruplus, Rafsteinn, Futuregrapher og ásamt fleiri góðum gestum. Í viðtali við Vísir.is segir annar stofnandi fyrirtækisins: „Við höfðum báðir verið að gera hávaðatónlist, bæði saman í Pyrodulia og hvor í sínu lagi undir mismunandi nöfnum, og datt svo í hug að stofna litla útgáfu sem myndi gefa út okkur og fleiri tónlistarmenn með svipaðar tónlistartilhneigingar.” Alls eru fjórtán lög á hljóðsnældunni og verður útgáfan einungis í 50 eintökum.

Hlekkir

Lady Boy Records á hvarmskinnu

Fjárfesta í hljóðsnældunni á Bandcamp

Fu Kaisha – Coltish

Raftónlistarundrið Fu Kaisha gaf nýverið út stuttskífuna Coltish og er hún fáanleg á bandcamp-síðu listamannsins. Stuttskífan, er eins og nafnið bendir til, lífleg og kraftmikil heiladanstónlist þar sem TB-303 hljóðgervill fær að njóta sín. Alls eru þrjú lög á skífunni: Heilen, Lluest og endurhljóðblöndun raftónlistarmannsins Placid á laginu Porth. Listamaðurinn gefur út skífunni sjálfur og er hún fáanleg fyrir einungis þrjár evrur (485 isk).

Fu Kaisha er Dagbjartur Elís Ingvarsson og spratt hann fram á sjónarsviðið fyrir rétt um tveimur árum síðan með stuttskífunni Porth / Mangaster, sem út kom á hinu alíslenska Möller Records. Tónsköpun Fu Kaisha er hægt að lýsa sem sýruskotinni heiladanstónlist með tregablendnum hljóðheimum inn á milli, sem minnir helst á listamenn eins og AFX og Wisp.

Hlekkir

Fu Kaisha á hvarmskinnu

Fu Kaisha á hljóðskýinu

Fu Kaisha – Coltish á Bandcamp